Mu Kampala, abasuubuzi abatunda amata bakaaba nga bagamba nti ebbeeyi eyongedde okuggwa olwa Kalantini era bangi Kapito aweddewo.
Ekikopo ky’amata, kigulwa shs 500, ate lita shs 1000, okuva ku shs 2000.
Waliwo abagatambuza nga bagayimba nga ku shs 400, bayinza okuwa ekikopo, ekyongedde okusanyalaza emirimu gy’abasuubuzi abayimiriddewo ku mata.
Omu ku basuubuzi abakaaba ye, Sharon Murekatete, agamba nti amata agasuubula Mbarara, Nakasongola, Goma ne Bulemeezi kyokka olwa Kalantini, abaguzi boongedde okwesala.
Agamba nti yali asuubula Lita ku shs 1600 nagitunda shs 2,000 kyokka mu kiseera kino ekya Kalantini Lita, agisuubula shs 800 nagitunda shs 1,000.
Murekatete agamba nti ku shs 200 ez’amagoba, kw’alina okugya ez’amasanyalaze, ezipangisa ekifo ssaako naye okwebezaawo.
Ate Nathan Sabiiti, agamba nti abasuubuzi okutunda amata shs 500, kyongedde okutta omulimu gw’okutunda amata mu Kampala, era bangi, kati bakola mmere ya leero.
Sabiiti agamba nti olw’omuggalo, atunda Lita 20 buli lunnaku eyali atunda Lita ezisukka 40 olunnaku.
