Ssentebbe w’ekibiina ki National Resistance Movement (NRM) era omukulembeze w’eggwanga Yoweri Museveni abikudde ekyama nti yakulembeddemu okulongoosa ekitongole ekisolooza omusolo mu ggwanga Uganda Revenue Authority (URA) olwa bakulembeze okwenyigira mu kulya enguzi.
Omwezi oguwedde, abakulembeze 4 mu kitongole ekyo, baalangiridde nti balekulidde okuli Dicksons Kateshumbwa, Henry Saka, Silajji Kanyesigye ne Samuel Kahima nga bonna baludde mu kitongole ate nga bakozi ba ku ntikko.
Wabula mukulu Museveni newankubadde tayatuukiriza linnya lya muntu yenna, agambye nti abakulu yabagobye olw’okubulankanya ensimbi z’eggwanga, “mu URA wabaddeyo obuli bw’enguzi. Naye namaze okutereezayo. Omugigi omuto ogubaddeyo gwawebwe omukisa okuwereza naye gugukozeseza bubi. Uganda ekungaanya ssente ntono munda muggwanga nga ziri ebitundu 14.3 ku buli 100 nga ate amawanga amalala gali ku 18 ku buli 100”.
Okubyogera, asinzidde ku State House Entebbe, oluvanyuma lwa Minisita w’ebyensimbi Matia Kasaija, okutegeeza eggwanga, bajjeti y’ebyensimbi ey’omwaka 2020 – 2021 nga ye asinzidde ku Palamenti.
Ku nsonga y’okulwanyisa Kolona, Pulezidenti Museveni agamba nti bwatambula ku nguudo za Kampala alaba bannayuganda tebeefiirayo naye tebagenda kwegayirira bantu kwambala masiki okwetaasa ku ssennyiga corona era bannayuganda bwebanaaba bagala kulaba ku mirambo gifudde corona bagenda kugiraba.
Mungeri Museveni agambye nti, “kati tulina abalina Covid-19 bali 679 naye muno mulimu abantu abalowoozebwa okubeera n’obulwadde naye nga tebabulina. Kino kyakolebwa abamu ku bakugu be Keberero lye Makerere. Ensobi eno yazuulibwa nebaddamu nebakeberwa nga balamu era aba minisitule y’ebyobulamu balina okutangaaza ku kino. Ekirwadde ki Covid-19 kikoseza nnyo ebitongole byaffe ebimu naye nze sitidde. Wadde tubadde ku muggalo naye ebintu ebitono byetukoze bituyambye okweyimirizaawo. Kati tuliwo ku lwaffe nga awatali kuyambibwa nsi z’ebweru era nze ndowooza corona yajja kutuyamba”.
Ate ku nsonga y’ebyokwerinda, Museveni agambye nti, “eby’okwerinda bya Uganda binywevu nnyo era tulina emirembe. Twenyezezza ekimala, abamu baali balowooza nti basobola okutabula emirembe gyetulina naye kino kyatuyamba okuzuukuka. Mu East Africa mukyalimu ebizibu naye tujja kubayambako kubanga tulina obusoobozi”.
Embalirira esomeddwa ya buse bwa Uganda 45
1. Eb’yenguudo obuse 5.8 (trillion) (13%)
2. Eby’okwerinda biwereddwa obuse 4.5 (trillion) (10%)
3. Okusasula amabbanja Obuse 4 (trillion) (9%)
4. Ebyenjigiriza obuse 3.6 (trillion) (8%)
5. Eby’obulamu obuse 2.7 (trillion).
