Kkooti y’amaggye esindise ku Limanda mu kkomera e Luzira abantu babiri (2) ku misango gy’obutemu n’obubbi mu disitulikiti y’e Masaka.
Abasindikiddwa e Luzira mwe muli Asuman Ssemifumbi akola ogw’okulongosa mu ddwaaliro e Kitovu ssaako ne Innocent Safari nga naye akola gwa kulongoosa ku Buddu Foundation Primary School era bonna babadde mu maaso g’omulamuzi Lt General Andrew Gutti.
Okusinzira ku ludda oluwaabi nga lukulembeddwamu Major Samuel Masereje nga 6, April, 2019, abavunaanibwa nga balina emmundu ekika kya ‘Sub Machine Gun’, banyaga omutuuze Vincent Kiberu obukadde 2 n’emitwalo 30 ssaako n’essimu ye.
Ku lunnaku lwe lumu banyaga Justine Nassazi shs 8000, engoye ssaako ne Laptop.
Mungeri y’emu bakulemberamu okutta Andrew Katongole eyali akulira abassomesa ku St Francis Bulayi Primary School ne Juliet Nassande eyakubwa amasasi nga 4, March, 2019 mu katawuni k’e Bulayi mu disitulikiti y’e Masaka.
Oludda oluwaabi lutegezeza omulamuzi nti bakyanonyereza, ekiwaliriza ssentebe wa kkooti Lt General Gutti, okubasindika ku Limanda okutuusa nga 25, June, 2019.
