Poliisi y’e Wakiso ekutte ssemaka Joseph Ssebuwufu ne mukyala Jessica Ssebuwufu ku misango gy’okutta Simon Kabanamukye abadde omukozi w’awaka.
Okusinzira kw’amyuka omwogezi wa Poliisi mu Kampala n’emirirwano Luke Owoyesigyire, ettemu likoleddwa ekkiro ekikeseza olunaku lwa leero ku kyalo Kalambi-Kiwumu mu ggombolola y’e Buloba mu disitulikiti y’e Wakiso.
Owoyesigyire agamba nti Kabanamukye okumutta kidiridde okumuteebereza nti abadde yenyigidde mu kumenya ekiyumba mwe balundira enkoko.
Poliisi egamba nti, ssemaka Ssebuwufu n’omukyala begatiddwako mutabani waabwe Michael Ndawula n’omukuumi w’ekiro Pascal Bicho baakubye Kabanamukye okutuusa lwe yafudde ne batwala omulambo gwe mu nsiko, mita 50 okuva awaka.
Mu kiseera kino, abakwate bali ku Poliisi y’e Mukono ku misango gy’obutemu ate omulambo gutwaliddwa mu ddwaaliro okwekebejjebwa.
Wabula abatuuze batabukidde Ssebuwufu kuba omulambo gwa Kabanamukye guzuuliddwa nga gusaliddwako amatu.
