Poliisi mu disitulikiti y’e Sembabule ekutte ssemaka Kusasira Steven, 43 ku by’okutta mukyala we Kisakye Elizabeth, 46 bwe yamutemye ebiso ebyamutiddewo ku kyalo Nakarerwe mu ggombolola y’e Lugusulu.
Okusinzira ku mwogezi wa Poliisi mu Greater Masaka Paul Kangave ssemaka Kusasira yakutte ejjambiya okusala mukyala we obulago era abatuuze webatuukidde okutaakiriza ng’amaze okusala obulago era ng’amaze okufa.
Ssemaka olwamaze okusala mukyala we obulago, yaduukidde mu kiyumba ekikadde okwetta kyokka Poliisi yasobodde okweyambisa embwa ezikonga olusu, okumuzuula nakwatibwa.
Poliisi egamba nti ssemaka Kusasira we bamutuukiddeko nga naye amaze okwesala obulago era amangu ddala, yatwaliddwa mu ddwaaliro ekkulu e Masaka akawungeezi k’olunnaku olw’eggulo okufuna obujanjabi.
Kangave agamba nti amangu ddala nga ssemaka awonye, bakumutwala mu kkooti ku misango gy’obutemu.
Kangave era agambye nti obutabanguko mu maka bateebereza nti y’emu ku nsonga lwaki ssemaka Kusasira yasse mukyala we.
Wabula abatuuze bagamba nti ssemaka okusala mukyala we obulago kirabika abadde alina ekigendererwa eky’okuwuuta omusaayi.
