Poliisi y’e Rukungiri ekutte Darius Tumuhimbise myaka 25 ku by’okutta omukadde Leo Kyomusizi myaka 72 abadde omutuuze ku kyalo Kafunjo Cell mu ggombolola y’e Rukungiri.
Okusinzira ku batuuze, omukadde Kyomusizi yafunye obutakaanya ne Tumuhimbise nga bali mu katawuni k’e Akarere olw’ensonga etamanyiddwa.
Amangu ddala, omugenzi Kyomusizi yakutte ejinja okulikuba Tumuhimbise kyokka Tumuhimbise yasobodde okwanguwa ennyo naalonda bbulooka nagikuba Kyomusizi ku mutwe era yagudde wansi ng’ataawa.
Omukadde Kyomusizi yafiiridde mu kkubo nga bamutwala mu ddwaaliro.
Omwogezi wa Poliisi mu bitundu bye Kigezi, Elly Maate agambye nti Tumuhimbise akwattiddwa ku misango gy’okutta omuntu era Poliisi etandiise okunoonyereza ekyavuddeko obutakaanya.
Wabula abatuuze abamu bagamba nti omukadde Kyomusizi abadde agezaako okulabula Tumuhimbise okwesonyiwa bazzukkulu be, okubasindikiriza mu nsonga z’omukwano ku myaka emito.
