Ssentebbe w’ekibiina kya NRM era omukulembeze w’eggwanga lino Yoweri Kaguta Museveni alagidde Minisita w’ebyobulamu, okuggala ‘pharmacy’ zonna ez’ obwannanyini ezeebulunguludde amalwaliro ga Gavumenti.
Museveni mu kiwandiiko kyafulumizza emisana ga leero, agambye nti yafunye okutegeezebwa nti ‘pharmacy’ zonna eziri okumpi n’amalwaliro z’abasawo abakola mu Gavumenti, era basindikayo abalwadde ne bagula eddagala mu kifo ky’okubawa erya Gavumenti eryobwereere.
Museveni mu ngeri y’emu agambye nti alagidde Minisita w’ensonga z’abakozi okuteeka mu nkola eky’okwongeza omusaala gwa basawo n’abasomesa ku yunivasite za Gavumenti.
Agamba nti okwongera abasawo n’abasomesa omusaala, kigenda kuyamba nnyo, okumalawo ebikemo ebiri ku mirimu gyabwe n’okutekawo embeera gye buggya okuwera abasawo ba Gavumenti okutandikawo eddwaaliro oba ‘clinic’ ez’obwanannyini.
Wabula akulira ekibiina ekigatta abasawo Dr. Ekwaro Obuku agambye nti Gavumenti erina okukola ogwayo okuteeka eddagala mu malwaliro okusinga okulemesa abasawo okutandikawo “clinic” zaabwe ekibayamba okulongosa ku byenfuna byabwe.
Wabula wadde ekiragiro kiyisiddwa, tekimanyiddwa ddi Minisita Dr Jane Ruth Aceng lw’agenda kukiteeka mu nkola.
