Poliisi etandiise okunoonyereza ku ngeri Pasita Noah Nabende abadde akulira ekkanisa ya Jesus’s fire church e Kitamiro mu disitulikiti y’e Buvuma gy’attiddwaamu.
Pasita Nabende abadde omu ku bavubi era yabula akawungeezi k’olunnaku olwa Mmande.
Ku lunnaku Olwokubiri, aba famire ssaako n’abatuuze, baafunye okutya, kwekutegeeza poliiisi ku nsonga ya Pasita okubuzibwawo.
Enkya ya leero ku Lwokuna, omulambo gwa Pasita Nabende guzuuliddwa era gusangiddwa ku lubalama lwe nnyanja Nnalubaale emanyikiddwa nga Lake Victoria okumpi n’ekizinga kye Ntiro.
Abatuuze bazudde eryato ly’omugenzi nga likwekeddwa mu lutobazi lwe Tome mu ggombolola y’e Busamuzi.
Wabula addumira Poliisi mu disitulikiti y’e Buvuma Salaama Namutosi agambye nti Pasita yakubiddwa amayinja ku mutwe emirundi egiwera okutuusa lwe yafudde.
Ate Livingstone Maka omu ku batuuze mu kitundu, agambye nti Pasita ayinza okuba yakubiddwa ababbi b’oku nnyanja era awanjagidde Poliisi okunoonya abatemu.
Ate Johnson Mukasa nga naye muvubi asabye Poliisi okunoonyereza ku kizinga kye Tome, eryato ly’omugenzi gye lyasangiddwa kuba kiteeberezebwa abatemu gye bava okutta banaabwe.
