Ssemaka Clay Kibwota myaka 44, addukidde ku Poliisi okweroopa oluvanyuma lw’okutta omwana wa Muganda we myaka 4 agy’obukulu.
Kibwota nga mutuuze ku kyalo Oyuru Aromo mu ggombolola y’e Labongo Amida mu disitulikiti y’e Kitgum yeetutte ku poliisi oluvanyuma lw’okutta Mitchel Ayerwot nga yamukubye omutwe ku kisenge kye nnyumba, akawungeezi k’olunnaku Olwokubiri.
Okusinzira ku ssentebbe wa LC ey’okusatu mu kitundu ekyo, Wilfred Nyeko, Kibwota ateeberezebwa nti mu kiseera ky’okutta omwana, yabadde anywedde enjaga n’ebiragalaragala era yasobodde okweyambisa omukisa nga nnyina w’omwana agenze mu luzzi ate nga Kitaawe atambuddemu.
Wabula akulira okunoonyereza ku buzzi bw’emisango ku Poliisi y’e Kitgum Robert Oken, agambye nti Kibwota abategeezeza nti, katonda we yamulagidde okutta omwana.
Wadde yeetutte ku Poliisi, aguddwako emisango gy’obutemu era okunoonyereza kutandikiddewo mbagirawo omuli n’okumwekebejja obwongo.
