Abantu bataano (5) bafiiridde mu kabenje ate munaana (8) basigadde bali mu mbeera embi ku luguudo oluva Soroti- Mbale.
Akabenje, kagudde ku kyalo Kumi- Apata okumpi ne Munisipaali y’e Kumi enkya ya leero, Fuso namba UBE 489W ebadde etisse Ente, embuzzi n’endiga, bw’eyingiridde Tuleera namba UAQ 925N/UAL 834X.
Okusinzira ku mwogezi wa Poliisi mu bitundu bye East Kyoga, Michael Odongo, Fuso eremedde omugoba waayo bw’egaanye okusiba n’eyingirira Tuleela ebadde epaakinze ebbali w’ekkubo.
Abafudde, bonna babadde basuubuzi ba Nte nga 3 bafiiriddewo mu kabenje ate 2 bafiiridde mu ddwaaliro.
Mu kiseera kino Poliisi etandiise okunoonyereza okuzuula ekituufu ekivuddeko akabenje.
