Omuyimbi Magada Ronald amanyikiddwa nga Maro alaze nti asajjakudde mu kisaawe ky’okuyimba bw’ategese ekivvulu okujjaguza okuweza emyaka 10 ng’ayimbira abantu.
Maro alina konsati ku Mestil Hotel e Nsambya ku Valentayine nga 14, February, 2020 etuumiddwa ‘Anjagala Live Concert‘ nga ku mulundi gunno awerekeddwaako abayimbi ab’enjawulo omuli Shane Palko okuva mu ggwanga erya America, Aziz Azion, Iryn Namubiru, Feffe Bussi, John Blaq n’abalala bangi nnyo.
Bw’abadde awayamu naffe, agambye nti alina okutwala ekivvulu mu bitundu by’eggwanga eby’enjawulo okusanyusa abawagizi be era nga 15, February, 2020, ali ku Transa Africa e Jinja, ate nga 16, February, 2020, Hotel 100 e Mbale.
Ku Mestil Hotel agamba nti okuyingira shs 50,000/=, VIP shs 100,000/= ate emmeeza y’abantu munaana (8) shs 1,000,000/=.
Mu myaka 10, Maro akubye ennyimba ez’enjawulo ezimufudde ow’enjawulo ku banne omuli Anjagala, Genda Ewamwe, Mpa Nkuwe, Nsiima n’endala mpitirivu nnyo.
Ekivvulu ‘Anjagala Live Concert’ kiwagiddwa kkampuni ez’enjawulo okuli Kagwirawo Instant bet Instant Cash, Coca-Cola, Bell n’endala.
