Poliisi ekutte abantu 4 ku by’okutta omuntu akawungeezi k’olunnaku olw’eggulo ku ssaawa nga 8.
Twinamasiko Cleofas myaka 28 yattiddwa, bwe yakubiddwa abatuuze ssako n’abenganda ze ku kyalo Butabo cell mu ggombolola y’e Ruhinda mu disitulikiti y’e Rukungiri gye yasangiddwa nga yekwese.
Twinamasiko abadde ayigibwa ku misango gy’okutta muganda we ate mukulu we Komuhangi Allen myaka 30 bwe yamutemye ebiso ku mutwe ssaako n’emikono naamutta ku Mmande ya sabiti eno nga 3, February, 2020 ku kyalo Ndere mu disitulikiti y’e Rukungiri.
Okusinzira ku batuuze, Twinamasiko yasanga Komuhangi ng’anoga emwanyi mu kibinja, kye yasikira okuva ku bazadde be kwe kumutematema ebiso okutuusa lwe yafa.
Elly Maate, omwogezi wa Poliisi mu bitundu bye Kigezi agambye nti Twinamasiko yakubiddwa okutuusa lwe yafudde olw’okutta muganda we era Poliisi weyatuukidde nga zembuyaga ezikunta.
Amangu ddala Poliisi yakoze okunoonyereza era abantu 4 bakwattiddwa ku by’okutwalira amateeka mu ngalo ne batta omuntu okuli Musasizi Charles, Mucunguzi Ambrose, Ainembabazi Christine ssaako ne Nduhukire Aloysius bayambeko mu kunoonyereza.
Ate omulambo, Poliisi egamba nti guli mikono gy’abasawo mu ddwaaliro erya Rwakabengo health centre 111 okwekebejjebwa.
