Poliisi ekutte omukyala Nakazibwe Robinah omutuuze ku kyalo Bulaga mu disitulikiti y’e Wakiso ku by’okutemako omwana we owoobuwala omutwe myezi 2.
Nakazibwe asobodde okweyambisa akambe n’ekisso okutemako omwana omutwe enkya ya leero.
Okusinzira kw’amyuka omwogezi wa Poliisi mu Kampala n’emirirwano Luke Owoyesigyire, Nakazibwe olumaze okutta omwana we, naye abadde agezaako okwetta.
Poliisi egamba nti okunoonyereza, kulaga nti Nakazibwe abadde mukozi mu kifo ekitunda ennyama y’embizzi ekimanyiddwa nga Kafunda mu katawuni k’e Bulaga.
Abatuuze baguddemu ekyekango ne bakubidde Poliisi essimu olwa Nakazibwe okutta omwana we era Poliisi wetuukidde, kwe kuddusa Nakazibwe mu ddwaaliro erya Family Clinic mu katawuni k’e Bulaga bw’asangiddwa nga yesaze, ayagala kwetta.
Poliisi esobodde okuzuula ekiso n’akambe nga bijjudde omusaayi era bitwaliddwa nga n’omulambo gw’omwana, gutwaliddwa mu ggwanika ly’eddwaaliro ekkulu e Mulago.
Owoyesigyire agamba nti Poliisi, etandiise okunoonyereza ekiwaliriza Nakazibwe okutta omwana we ssaako naye okwagala okwetta.
Eddoboozi lya Luke
