Kyaddaki Ssentebbe w’ekibiina ekigata ba ddereeva ba Takisi mu ggwanga ekya Uganda Transport Development Agency (UTRADA) Mustafa Mayambala abikudde ekyama lwaki baddereeva ne bakondakita abamu bawunya mu kutambuza emirimu gyabwe.
Sabiti ewedde ku Lwokuna, waliwo ddereeva gwe banaaza mu bitundu bye Bukasa – Bweyogerere nga bagamba nti asukkiridde okuwunya kuba yali tanaaba.
Wabula Mayambala agamba nti newankubadde mulimu gwa takisi banaabwe abasukkiridde okuwunya, baddereeva ne bakondakita bangi basajja bayonjo nnyo.
Bw’abadde awayamu naffe, agambye nti waliwo ebintu bingi ebiyinza okuvaako baddereeva ne bakondakita okulabika nga abakyafu mu ntambuza y’emirimu gyabwe.
Mayambala agamba nti bangi ku baddereeva ne bakondakita bakolera ku nguudo ezijjudde ebinnya, enfuufu buli lunnaku, nga kiba kizibu nnyo, omuntu okwekuuma nga muyonjo.
Mungeri y’emu agambye nti bali mu nteekateeka okuteekawo ebbanguliro ly’abantu bonna abali mu mulimu gwa Takisi okubasomesa ebintu eby’enjawulo omuli okuwa bakasitoma ekitiibwa, okweyonja n’okubasomesa amateeka g’oku nguudo.
Vidiyo
