Mu kiseera ng’emboozi y’omusaala omutono ku bakozi b’oku TV ne Laadiyo ekyalanda, nate munnamawulire Joseph Sabiiti ye ali mu ssannyu oluvanyuma lw’okufuna omulimu ng’afuna bukadde bwa ssente.
Sabiiti yava ku NBS TV omwaka oguwedde ogwa 2019 mu September oluvanyuma lw’okufuna omulimu n’ekitongole ky’obwannakyewa ekya Action Aid.
Ku ntandikwa y’omwezi oguwedde ogwa April, amawulire gaafuluma nga galaga nga Sabiiti bw’afunye omulimu omulala ku Vision Group ng’omukozi ku Urban TV.
Sabiiti baamuwa Pulogulamu ‘Check Point’ kyokka oluvanyuma lwa muwala wa Frank Gashumba, Sheilah Gashumba okuvaayo okutegeeza nti bangi ku bakozi b’oku TV tebasukka musaala gwa 1,000,000 buli mwezi, agava mu Urban TV galaga nti ebintu byanjawulo.
Omu ku bakozi agaanye okwatuukiriza amannya ge mu Vision Group agambye nti Sabiiti yasayininga kontulakiti ya myaka 2 nga buli mwezi alina okufuna omusaala gwa 6,000,000.
Mungeri y’emu agambye nti oluvanyuma lw’emyaka 2, Sabiiti alina okuddamu okutuula n’abakulu okuddamu okuteesa ku ndagaano.
Ng’omukozi omulala yenna, Sabiiti alina okunoonya Kampuni ezimuwa omusaala omusava okusobola okutuukiriza ebirooto bye.
