Pasita Augustine Yiga owa Revival Christian Church e Kawaala alaze nti ddala Katonda we akola era alina okumusinza ebbanga lyonna.
Sabiti eno ku Lwokuna, omusajja munnansi wa German Bernhard Glanser Berry yafiiridde mu kkomera e Luzira ekirwadde kya Kansa w’olususu.
Bernhard yabadde ku limanda okuva 2019 ku misango 19 egy’okukusa abaana n’emisango 5 egy’okusobya ku baana abato, ekiraga nti kisoboka bulungi nnyo omuntu yenna okufiira mu kkomera.
Oluvanyuma lwa Bernhard okufa, tukuleetedde engeri Pasita Yiga gye yasimatuse okufiira mu kkomera lye Kitalya mu disitilikiti y’e Wakiso.
Pasita Yiga yayimbuddwa kakalu ka kkooti ka ssente obukadde 2 ezitali za buliwo ku lunnaku Olwokubiri nga 5, May, 2020, omulamuzi wa Buganda Road Timothy Lumunye.
Wabula okumuyimbula, kyavudde ku Munnamateeka we Wilber Kayiwa okutwala ebbaluwa y’eddwaaliro okuva ku Lisa Medical Centre e Mengo, okulaga nti Pasita Yiga mulwadde wa Sukaali ate yetaaga obujanjabi obwamangu.
Munnamateeka Kayiwa yategeezeza omulamuzi Lumunye nti Pasita Yiga yalina okufuna obujanjabi nga 15, April, 2010 era singa tayimbulwa, obulwadde buyinza okweyongera.
Sukaali y’emu ku ndwadde enkambwe era abantu bangi bafudde mu bwangu olwa sukaali, ekitegeeza nti Pasita Yiga yalina okufuna obujanjabi mu bwangu, okusobola okutaasa obulamu.
