Abadde akulira eddwaaliro lya Pabo Health Center III mu disitulikiti y’e Amuru Wilfred Okello attiddwa olw’obutakaanya ku ttaka.
Okello abadde mutuuze ku kyalo Olwiyo mu ggombolola y’e Alero mu disitulikiti y’e Nwoya era yattiddwa akawungeezi k’olunnaku olw’eggulo ku Ssande ku ssaawa 1 n’ekitundu bwe yabadde ava mu maka ga ssentebbe wa LC ey’okubiri (LC II), abavubuka bataano (5) nga bakutte ejjambiya ne bamutematema nafiirawo.
Paulo Okeny, ssentebbe wa LC ey’okusatu mu ggombolola y’e Alero agambye nti abavubuka basse Okello nga bamulanga okuviirako nnyabwe ategerekeseeko erya Labol okusibwa olw’obutakaanya ku ttaka.
Okeny agamba nti Okello yamutuukirira mu 2018 ng’amusaba okumuyambako okumalawo obutakaanya ku ttaka era kwe kumuwa amagezi okukolagana n’abatuuze.
Jimmy Patrick Okema, omwogezi wa Poliisi mu bitundu bya Aswa agambye nti abavubuka bonna 5 bakwattiddwa era batwaliddwa ku Poliisi y’e Anaka ku misango gy’obutemu.
Mungeri y’emu agambye nti Poliisi ezudde ne ppikipiki ya Gavumenti namba UG 5794M omugenzi gye yabaddeko.
Omulambo gutwaliddwa mu ddwaaliro lya Anaka okwekebejjebwa.
