Entiisa ebuutikidde abatuuze ku kyalo Nyakabungo mu ggombolola y’e Buhara mu disitulikiti y’e Kabale, ssemaka Denis Michael Owamani bwe yesse ng’alemereddwa okufuna shs 1,000/= ez’ogulira famire omunnyo.
Owamani yasse akawungeezi n’olunnaku olw’eggulo ku Mmande nga yeetugidde mu nju ye.
Okusinzira ku ssentebbe w’ekyalo Joseph Akampurira, Omugenzi Owamani yafunye obutakaanya ne mukyala we ku nsonga z’omunnyo oluvanyuma lw’okulemwa okufuna shs 1,000 ez’okuwa famire.
Omukyala kati Nnamwandu yatambuddemu lw’obusungu kyokka yagenze okudda ng’abba yeetugidde mu ddiiro n’omuguwa.
Okusinzira ku mwogezi wa Poliisi mu bitundu bye Kigezi Elly Maate, Owamani weyeetugidde, wasangiddwawo ekifaananyi kye nga kiwandikiddwako X.
Maate agamba nti okunoonyereza ku kyavuddeko okwetta kutandikiddewo okuzuula ekituufu.
