Kkooti enkulu mu Kampala esazeewo nga ebikolwa bya poliisi okugaana ekivvulu kya Kyarenga eky’omubaka we Kyadondo East, Robert Kyagulanyi (Bobi Wine) ekyalina okubeera ku One Love Beach e Busabaala ku Easter Monday y’omwaka oguwedde ogwa 2019 kyali kimenya mateeka.
Okusinzira ku nsala y’omulamuzi Esta Nambayo, ebbaluwa ya Poliisi eyafulumizibwa nga 19, April, 2019 okuyimiriza ebivvulu bya Kyarenga Extra, kyali kimenya mateeka n’okweyambisa offiisi mu bukyamu.
Mu kkooti, omusango gwatwalibwayo Abtex Productions ne Bajjo Events and Marketing Agencies limited ebikulemberwa Abbey Musinguzi (Abtex) ne Andrew Mukasa (Bajjo).
Ebivvulu byali birina okutwalibwa mu bitundu eby’enjawulo omuli Gulu, Lira, Arua ne Kampala kyokka Poliisi byonna yabiremesa nga yekwasa obusongasonga.
Omulamuzi yalagidde omuduumizi wa poliisi mu ggwanga, Martin Okoth Ochola okusasula ssente zonna Bajjo ne Abtex ze basasaanyiza mu musango.
Bajjo alangiridde nti oluwangudde omusango, balina okuddamu okutekateeka ebivvulu mu ggwanga lyonna, Bobi Wine okuddamu okuyimba n’okutandikira ku Beach e Busabala era balina okutandikirawo ng’abantu bavudde ku muggalo gwa Covid-19.
