Omulamuzi wa City Hall mu Kampala agobye okusaba kwe yaliko Minisita w’ebyokwerinda Lt. General Henry Tumukunde okulagira Gavumenti okwanguyiriza okunoonyereza ku misango egyamuggulwako omuli okulya mu nsi olukwe n’okusangibwa n’ebyokulwanyisa mu ngeri emenya amateeka.
Tumukunde enkya ya leero akedde mu kkooti omulundi ogusoose bukya ayimbulwa okuva ku Limanda mu kkomera e Luzira sabiti ewedde gye yakulungudde emyezi egigenda mwe 2.
Ng’ayita mu bannamateeka be, Anthony Wameli ne Geoffrey Turyamusiima, Tumukunde asabye omulamuzi Valerian Tumuhimbise, okuwa Gavumenti omulundi ogusembayo, ogwongezaayo omusango okuleeta obujjulizi nga bafundikidde okunoonyereza.
Turyamusiima agamba nti omuntu we Tumukunde yeegwanyiza obukulembeze bw’eggwanga lino mu kulonda kwa 2021 nga yetaaga obudde okwetekateeka obulungi ng’emisango gya kkooti giwedde.
Wabula oludda oluwaabi nga lukulembeddwamu Joseph Kyomuhendo lusimbidde ekkuli okusaba kwa Tumukunde nga bagamba nti bakyetaaga obudde okunoonyereza kyokka olwa Kolona n’omuggalo, okunoonyereza kutambula kasoobo.
Omulamuzi Tumuhimbise akiriziganyiza n’oludda oluwaabi era okusaba kwa Tumukunde kugobeddwa era wakuddamu okweyanjula mu kkooti nga 22, June, 2020.
