Mu kiseera nga bannakisinde kya People Power begwanyiza obukulembeze bw’eggwanga lino nga bakulembeddwamu, omubaka we Kyadondo East, Robert Kyagulanyi Ssentamu (Bobi Wine), nate Ashburg Katto abasekeredde.
Ashburg olunnaku olw’eggulo yalangiridde mu butongole nti avudde mu People Power era kati muwagizi wa NRM ne Pulezidenti Yoweri Kaguta Museveni kuba yamusuubiza ebintu bingi omuli n’okuyamba abantu b’omu Ghetto.
Wabula wadde Bobi Wine ne bannakisinde kya People Power bagamba nti singa bawangula obukulembeze w’eggwanga mu kulonda kwa 2021, y’engeri yokka ey’okwambala engule, Ashburg alaze nti ye wanjawulo nnyo.
Ashburg asobodde okweyambisa omukutu ogwa Face Book okutegeeza bannakisinde kya People Power nti ye abasoose mu Uganda okwambala engule oluvanyuma lw’okusisinkana Pulezidenti Museveni, “MBASOOSE OKWAMBALA ENGULE“.
Ebigambo bya Ashburg biraga nti 2021 teyeetaaga nkyukakyuka mu ggwanga kuba Pulezidenti Museveni yamwambaza engule.
