Minisita omubeezi ow’ekikula ky’abantu n’ebyobuwangwa Peace Mutuuzo abikudde ekyama nti abayimbi ne bannakatemba bafiiriddwa Biriyoni ezisukka 150 olwa kolona.
Minisita agamba nti ebivvulu ebisukka mu 300 byasazibwamu nga bitekedwamu ssente mpitirivu, ezaafiiramu.
Mungeri y’emu agambye nti abayimbi abasukka 10,000, bali bategese ebivvulu eby’enjawulo kyokka olwa Kolona byayimirizibwa nga biteekeddwamu obukadde n’obukadde bwa ssente.
Minisita okubyogera, abadde ajjukiza bannayuganda nti Uganda yegasse ku nsi yonnna olunnaku olwaleero, okujaguza olunnaku lwe’ebyobuwangwa wadde eggwanga, likyali ku muggalo.
Minisita Mutuuzo abadde ku Media Centre mu Kampala enkya ya leero, okutegeeza nti abayimbi ne bannakatemba bafiiriddwa nnyo mu kiseera kino.
Abamu ku bayimbi abali mu maziga mu kiseera kino ye Eddy Kenzo kuba Kolona weyatuukira mu Uganda, yali alina ekivvulu e Kololo era agamba nti yali akitaddemu obukadde bwa ssente kyokka zonna zaafa.
N’abayimbi abalala omuli Bebe Cool, Sheebah Kalungi, Spice Diana, John Blaq n’abalala embeera sinungi olw’ebivvulu byabwe okusazibwamu olw’omuggalo.
