Poliisi etandiise okunoonyereza ku kyavuddeko omusomesa wa pulayimale okwetta.
Aloysius Khatondi myaka 54 abadde musomesa ku Bubungi Primary school era abadde mutuuze ku kyalo Khabuku cell mu Tawuni Kanso y’e Nangako mu disitulikiti y’e Bududa, yasangiddwa emanju w’ennyumba ye, ng’alengejjera ku muti, olunnaku olw’eggulo ku Ssande.
Okusinzira ku ssentebbe w’ekyalo Daison Mukuwa, omugenzi abadde muntu wa bantu era abadde omu ku basomesa abakwatiridde eby’enjigiriza mu kitundu kyabwe olw’abaana abangi baasomesezza.
Neyiba w’omugenzi John Nangosi, agamba nti omugenzi abadde yamutegezaako nga bw’agenda okwetta nga kivudde ku musaala omutono gwafuna nga tegusobola kubezaawo famire ye omuli okubaliisa, okubasomesa, abadde alina amabanja ate embeera y’omuggalo eyongedde kusajjula embeera.
Wabula Rogers Taitika, omwogezi wa Poliisi mu bitundu bye Elgon agambye nti kituufu omusomesa yesse, naye balina okunoonyereza ekyavuddeko obuzibu, okutuusa okwetta.
