Poliisi y’e Kassanda ekutte omusajja Joseph Mugerwa myaka 35 ku by’okutta kitaawe Enock Sennyonga abadde omutuuze ku kyalo Kigalama mu ggombolola y’e Myanzi.
Omulambo gwa Sennyonga gusangiddwa mu nju eyakoneddwa abantu abatamanyiddwa. Mu nnyumba, musangiddwamu akambe n’embazzi nga byonna bijjudde omusaayi.
Abatuuze bateebereza nti abatemu, bakozeseza akambe okutta Sennyonga oluvanyuma ne beeyambisa embazzi okukoona ennyumba, okubuzabuza obujulizi nti enju yamugwiridde.
Jane Nakaayi, amyuka ssentebbe w’ekyalo agamba nti omugenzi Sennyonga n’omutabani Mugerwa babadde basula mu nju emu kyokka ye (Mugerwa) teyabaddewo awaka mu kiseera ng’abatemu balumbye, ekiraga nti yabadde mulukwe ate baludde nga balina obutakaanya omuli n’ensonga zettaka.
Omwogezi wa Poliisi mu bitundu bye Wamala Rachael Kawala, agambye nti okunoonyereza kutandikiddewo mbagirawo era omulambo gwatwaliddwa mu ddwaaliro lya Kassanda health centre IV okwekebejjebwa.
