Kkooti ewozesa abalyake mu Kampala efulumizza ekiwandiiko ekiragira omuyimbi Joseph Mayanja amanyikiddwa nga Dr. Jose Chameleon okweyanjula mu kkooti okwewozaako ku misango gy’okulemwa okuwa omusolo gwa bukadde 137.
Omulamuzi Pamela Lamunu Ocaya alagidde Chameleon okweyanjula mu kkooti nga 30, July, 2020 okwewozaako.
Chameleon aguddwako emisango 2 omuli okuba n’ekidduka ekitaliiko nnamba n’okulemwa okuleeta ebiwandiiko byakyo.
Okusinzira ku kiwandiiko ekiteekeddwako omukono gwa Simon Peter Ogwang, omukozi mu kitongole ky’omusolo mu ggwanga ekya Uganda Revenue Authority (URA), Chameleon yasangibwa n’emmotoka ekika kya Toyota Land Cruiser V8 namba SSD 499B okuva mu ggwanga erya South Sudan mu bitundu bye Wakaliga-Bulange Mengo nga 12, April, 2020.
Ogwang agamba nti Chameleon baamulagira okutwalira URA ebiwandiiko ebiraga nti emmotoka ekkirizibwa mu Uganda, ekintu ekyamulema n’okutuusa kati.
URA egamba nti Chameleon yalemwa okusasula omusolo gw’okuyingiza emmotoka mu Uganda obukadde 137.
