Minisita avunaanyizibwa ku nsonga z’abaana n’abavubuka Florence Nakiwala Kiyinji abikudde ekyama nga Minisitule evunaanyizibwa ku buwangwa n’ekikula ky’abantu bw’etegese okuyamba abayimbi abakoseddwa mu kiseera kino eky’okulwanyisa Covid-19.

Minisitule agamba nti abayimbi bangi baakosebwa oluvanyuma lw’omukulembeze w’eggwanga Yoweri Kaguta Museveni okuyimiriza ebivvulu omwezi Ogwokusatu, 2020,  ng’emu ku ngeri y’okutangira Covid-19 okusasaana.

Kati no, Minisita Nakiwala agamba nti abayimbi betaaga okuyambibwa nga Minisitule y’ekikula ky’abantu n’obuwangwa etegese Biriyono 6 n’obukadde 600 okubayamba.

Mu kwogerako eri bannamawulire mu Kampala, Minisita Nakiwala agamba nti Gavumenti eri mu kutekateeka engeri abayimbi gye banafunamu ensimbi zaabwe n’engeri abaakosebwa gye bagenda okutematema ensimbi ezo.

Mungeri y’emu abikudde ekyama nti omuyimbi Eddy Kenzo y’omu kw’abo, abawaddeyo ebiwandiiko ebiraga ensimbi zeyafiirwa, oluvanyuma lw’okuyimiriza ekivvulu kye ekya Eddy Kenzo Festival 2020 e Kololo ekyali kirina okubaawo nga 28, Ogwokusatu, 2020.

Eddoboozi lya Nakiwala