Munnakibiina kya FDC Dr. Kizza Besigye alangiridde nti ye mwetegefu okuwagira omuntu yenna okuva ku ludda oluvuganya Gavumenti singa alaga nti mwetegefu okutambulira ku mulamwa gw’okuleeta enkyukakyuka mu ggwanga.
Dr. Besigye yalangiridde nti 2021 tagenda kuddamu kwesimbawo ku bwa Pulezidenti bwa Uganda oluvanyuma lw’okuvuganya Pulezidenti Yoweri Kaguta Museveni emirundi 4.
Bwe yabadde ayogerako eri bannakibiina ku Lwokusatu, yasabye FDC okuleeta omuntu akulemberamu Pulani A nti ye agenda kulembera Pulani B okuleeta enkyukakyuka mu ggwanga.
Mu kiseera kino, FDC erina abantu babiri (2) abavuddeyo okukwatira ekibiina bendera ku bwa Pulezidenti bwa Uganda mu kulonda kwa 2021 okuli Pulezidenti w’ekibiina Patrick Oboi Amuriat ne ssentebe w’ekibiina Wasswa Birigwa.
Wabula Besigye agamba nti wadde tagenda kwesimbawo mu 2021, akyali mu byabufuzi okutuusa nga Uganda efunye enkyukakyuka mu bukulembeze.
Besigye agamba nti wadde abantu bangi abegwanyiza entebe y’obwa Pulezidenti, omuntu yekka gw’agenda okuwagira mu 2021, alina okulaga nti mwetegefu okununula eggwanga okuva mu busibe n’okulaga nti alina obusobozi okugatta bannayuganda.
