Entiisa ebuutikidde abatuuze ku kyalo Kasirima mu ggoombolola y’e Maziba mu disitulikiti y’e Kabale, ssemaka John Turyahikayo myaka 57 bwe yeetugidde mu nnyumba.
Omulambo, gusangiddwa mu kisenge nga gulengejja ku ssaawa nga 5 ez’okumakya.
Abaana, bagamba nti bakedde kulya kyankya nga kitaabwe ng’ali mu mbeera nungi ddala kwe kumulekawo ne bagenda mu nimiro era bagenda okudda, amaaso gatuukidde ku mulambo nga yetugidde mu kisenge kye.
Mungeri y’emu abaana bagamba nti Nnyabwe, abadde mu ddwaaliro e Kabale okumala kati sabiti emu, olwa muto waabwe okulwala omutwe.
Ekivuddeko ssemaka okwetta tekimanyikiddwa wabula Poliisi etandiise okunoonyereza.
Elly Maate, omwogezi wa Poliisi mu bitundu bye Kigezi agumizza abatuuze okunoonyereza okuzuula ekituufu ekivuddeko omusajja omukulu okwetta.
