Laddu esse abaana 10 nga bonna balenzi ku kisaawe ku kyalo Gbulukua mu ggoombolola y’e Ayivu mu kibuga kye Arua.
Abalenzi bali wakati w’emyaka 12 ne 15 era battiddwa akawungeezi k’olunnaku olw’eggulo ku Lwokuna mu nkuba eyabadde efuyirira eyabasanze ku kisaawe ate abalenzi abalala baasobodde okwegama enkuba mu nsisira okumpi n’ekisaawe.
Okusinzira ku Alex Ndema, akulira ebyokwerinda mu ggoombolola y’e Ayivu West, omwana omu yafiiriddewo ate abalala 9 bafiiridde mu ddwaaliro lya Arua Regional Referral Hospital.
Mu kiseera kino abaana 3 bali mu mbeera mbi mu ddwaaliro lya Ayivuni health centre II.
Dr Filbert Nyeko, akulira eddwaaliro lya Arua Regional Referral Hospital agambye nti abasawo bakoze kyonna ekisoboka okutaasa abaana wabula tekisobose.
Wabula Josephine Angucia, omwogezi wa Poliisi mu bitundu bye West Nile agambye nti Poliisi ekyanoonya amawulire ku nfa y’abaana.
