Poliisi e Masaka ekutte omusirikale wa Poliisi ne mikwano gye 3 ku misango gy’obubbi.
Omukwate ye Corporal Joel Ebeta okuva ku Poliisi e Kitovu, Nyendo, mukwano gwe Rajab Kyebambe n’abalala 2.
Omusirikale ne banne bakwattiddwa enkya ya leero oluvanyuma lw’okuteeka emisanvu e Kitovu okumpi ne Kkanisa ye Kitovu.
Okusinzira kw’addumira Poliisi mu disitulikiti y’e Masaka David Katunda Nyesigire, abatuuze baludde nga bemulugunya ku babbi abaludde nga bateeka emisanvu mu kkubo ne batwala ebintu byabwe n’okubagyamu ensimbi.
Mu kukwattibwa, Poliisi ezudde emmundu, amasasi 28, jaketi ya Poliisi, emmotoka entono mwe batambulira namba UAG 337A, ejjambiya n’effumu.
DPC Nyesigire agamba nti Poliisi eyongedde amaanyi mu bikwekweeto okuzuula abantu bonna abenyigidde mu kutigomya abatuuze n’okusingira ddala mu bitundu bye Nyendo.
