Abantu 2, bafiiridde mu Kabenje emisana ga leero, ate 3 baddusiddwa mu ddwaaliro nga bali mu mbeera mbi, nga kivudde mu mmotoka ekika kya Tippa Isuzu namba UAM 372L okulemwa okulinya akasozi yefuula emirundi egiwera.

Akabenje kadde ku luguudo lwe Mbalwa mu Divizoni y’e Kira era Tippa ebadde etwala Bulooka eza 99.

Mu kwevulungula, egwiridde abantu 2 era ne bafiirawo ate 3 abatwaliddwa mu ddwaaliro, kigambibwa babadde bakozi ku Tippa.

Wabula amyuka omwogezi wa Poliisi mu Kampala n’emirirwano Luke Owoyesigyire, agambye nti bakitegeddeko nti ddereeva abadde avuga emmotoka aliira ku nsiko mu kiseera kino kyokka adduse amenyese omukono.

Emirambo gitwaliddwa mu ddwaaliro ekkulu e Mulago nga Poliisi bwenoonyereza ekivuddeko akabenje.