Entiisa ebuutikidde abatuuze be Nansana mu disitulikiti y’e Wakiso, omusuubuzi bw’attiddwa enkya ya leero.
Omukyala Prosy Nakibi ali mu gy’obukulu 35 abadde mutuuze ku kyalo Nansana East B era abadde mutuuzi wa mmere.
Abatemu, bamusangirizza kumakya ng’agenda okusuubula ne bamunyoola ensingo ne bamutta ne batwala obusente bwonna.
Owa bodaboda abadde akedde okutambuza emirimu gye, yagudde ku mulambo gwa Nakibi era amangu ddala kwe kuyita Poliisi y’e Nansana ku Masitoowa.
Okusinzira kw’amyuka omwogezi wa Poliisi mu Kampala n’emirirwano Luke Owoyesigyire, omulambo gwa Nakibi gutwaliddwa mu ddwaaliro ekkulu e Mulago okwekebejjebwa era agumizza abatuuze nga Poliisi bw’egenda okweyambisa Kkamera eziri mu kitundu, okubayambako okuzuula abatemu.
Wabula abatuuze b’omu kitundu nga bakulembeddwamu Josephine Namwanga, bagamba nti Poliisi esukkiridde obulagajjavu ku nsonga y’okulawuna, ekiwadde abatemu omukisa, okweyongera okutirimbula bannansi.
