Poliisi ng’eyita mu bitongole byayo okuli ekikessi, ekinoonyereza ku misango n’ekitongole ky’amagye ekikessi ekya Chieftaincy of Military mu bitundu bye Mbale ne Mukono, bakoze ekikwekweeto ku babbi b’emmotoka.
Mu kikwekweeto, bakutte ababbi abakulu abaludde nga benyigira mu kubba emmotoka ku mikolo gye mbaga, okwanjula, okuziika, Pakingi, amasinzizo, ebbaala, Kirabu, amaka g’abantu ssaako n’ebifo ebirala.
Okusinzira ku mwogezi wa Poliisi mu ggwanga Fred Enanga, okunoonyereza kwatandikidde ku kyalo Nkonge e Mukono nga 5, July, 2022 oluvanyuma lw’ababbi okwenyigira mu kubba emmotoka namba UAP 778G era amangu ddala Poliisi yakwata Nsubuga Mukwaya Hassan okuva e Wobulenzi mu ggoombolola y’e Katikamu mu disitulikiti y’e Luweero.
Mukwaya yakulembeddemu ebitongole byokwerinda okukwata Musisi Alex amanyikiddwa nga Mark Butyampa ku kyalo Bulijjo mu muluka gwe Kiyunga mu ggoombolola y’e Kyampisi mu disitulikiti y’e Mukono.
Emmotoka eyali yabbibwa, yazuuliddwa nga kuliko enamba enjigirire UAM933G.
Okunoonyereza kulaga nti Mukwaya ne Musisi baludde nga benyigira mu kubba emmotoka mu bitundu by’eggwanga eby’enjawulo omuli Kampala, Mukono, Luweero n’ebitundu ebirala.
Oluvanyuma lw’okubba emmotoka, Poliisi ezudde nti bakyusa enamba ne bazitunda eri omusuubuzi Kisule Juma amanyikiddwa nga jjajja Mbale ate olumu yeeyita Muwada Juma, Walusimbi Juma oba Wambedde.
Enanga agamba nti ekikwekweeto kyatambudde okutuusa e Mbale era ebitongole byabwe kwe kuzuula emmotoka 16 ezigambibwa okuba enzibe okuva mu bitundu by’eggwanga eby’enjawulo.
Emmotoka ezazuuliddwa kuliko
1.Toyota Noah eyali namba UAP 778G ne bakyusa okudda ku UAM933G.
2. Toyota Spacio – UAX 578M
3. RAV 4 – UAJ635G
4. Subaru UAG 242Z
5. Premio – UAU 911C
6. Premio – UAQ 742D
7. Noah – UAR 509K
8. Ipsum – UAN 794Z
9. Isuzu Tipper 2 ton – UBA 784U
10. Toyota Passo – UBG 044G
11. Premio – UAU 406A
12. Ipsum – UAP 772D
13. Ipsum – UAP 735B
14. Premio – UAT 287H
15. Toyota Starlet – UAN 223Y
16. Toyota Regius – UAN 706r
17. Toyota Pickup – UAH 436J
Enanga agamba nti okunoonyereza okuzuula ababbi bonna kuli mu ggina nnene.
Ebirala ebifa mu ggwanga – https://www.youtube.com/watch?v=wWw9hGk6RTA
