Omusajja ali mu gy’obukulu 30 awonye okuttibwa abatuuze, bw’asangiddwa ng’ali mu kaboozi ne muk’omusajja mu kiyumba ekitanaggwa e Kayunga mu disitulikiti y’e Nakaseke.
Kigambibwa, omukyala abadde yakafumbirwa omwezi oguwedde ogwa Desemba, 2021 kyokka mu kaboozi, asangiddwa n’omusajja gw’agamba nti yali muganzi we.
Okusangibwa mu kiyumba, kivudde kw’omu ku batuuze ategerekeseeko erya Kamya, abadde agenze ku nsiko okunoonya omuddo gw’ente (ebisubi), akawungeezi ka leero.
Omusajja omusiguze wadde tamanyikiddwa mannya ge, kigambibwa abadde mutuuze we Semuto era Kamya agamba nti amaloboozi g’omukyala ng’ali mu kaboozi, agabadde gava mu kiyumba, y’emu ku nsonga lwaki akiyingidde, okwekeneenya embeera era amangu ddala akubye enduulu, esombodde abatuuze.
Omukyala asabye okusonyiyibwa wabula bba ategerekeseeko erya Juma, amugobye mu nnyumba kuba wadde mugole, alaze nti mukyala bwenzi nnyo.
Mungeri y’emu Juma avudde mu mbeera, era asuubiza okuddayo mu famire y’omukyala, okumuddiza ebintu bye.
Ate abatuuze batabukidde omukyala okuleeta omusajja ku kyalo kwe yafumbiddwa.
Omusajja asonyiyiddwa kyokka asabiddwa okutwala mukyala we.
