Ssentebe w’ekibiina ki National Resistance Movement (NRM) era omukulembeze w’eggwanga lino Yoweri Kaguta Museveni alagidde ekitongole ekya Poliisi, okunoonya abantu bonna, abaali bakwatibwa nga benyigidde mu kubba ebisolo omuli embizzi, embuzi, enkoko ente n’ebirala kyokka Poliisi nebbakiriza okufuna bbondi, baddemu bakwatibwe.
Mukulu Museveni mu ngeri y’emu azzeemu okulagira ekitongole ekya Poliisi, obutagezaako wadde okuddamu okuyimbula abantu bonna, abenyigidde mu kubba ebisolo nga bateekeddwa okubatwala mu kkooti, nga ne mu kkooti, tebalina kuyimbulwa.
Okubyogera, abadde afundikira okulambula aba Greater Mpigi ku nsonga za Parish Development Model (PDM) mu lukungaana lw’abadde akubye ku kisaawe kye Kituntu e Nkozi mu disitulikiti y’e Mpigi.
Okuwa ebiragiro, kivudde ku batuuze okwemulugunya ku babbi, abasukkiridde mu bitundu byabwe nga batwala ebisolo byabwe.
Olunnaku olwaleero, jjajja Muzeeyi Museveni atandiika okulambula kwe mu bitundu bya Greater Mukono omuli Mukono, Kayunga, Buikwe ssaako ne Buvuma.
Olunnaku olwaleero, agenda kulambula abalimi n’abalunzi omuli Muhereza Wako ne Edward Mubiru e Buvuma ssaako ne Harriet Nampa mu disitulikiti y’e Mukono.
Okusinzira ku kitongole ky’ebibalo mu ggwanga ekya Uganda Bureau of Statistics (UBOS), alipoota ya 2024 eraga nti mu Greater Mukono, balina abantu 2,087,677 – https://www.youtube.com/watch?v=F8LPleFqdJg&t=318s
