Ssentebbe w’ekibiina kya National Resistance Movement (NRM) era Pulezidenti w’eggwanga lino Yoweri Kaguta Museveni atendereza emirimu egikoleddwa eyaliko Ssaabaminisita wa Uganda Apolo Robin Nsibambi.
Nsibambi abadde atawanyizibwa ekirwadde kya Kkookolo w’obusajja okutuusa lwe yafudde olunnaku olw’eggulo ku Lwokubiri ku myaka 78.
Ku ssaawa 6 n’eddakika 25 ez’omutuntu, Pulezidenti Museveni atuuse mu maka g’omugenzi Nsibambi e Bulange mu Divizoni y’e Rubaga ng’awerekeddwako mukyala we era Minisita w’ebyenjigiriza n’emizannyo, Janet Museveni.
Pulezidenti Museveni ne mukyala we bafunye akadde ak’enjawulo ne Namwandu Easter Nsibambi ssaako ne famire n’okuteeka omukono mu kitabo kya bakungubazi.
Bw’abadde eyogerako eri abakungubazi bonna, Pulezidenti Museveni ayogedde ku mugenzi ng’omusajja akoze nnyo mu kutumbula ebyenjigiriza omuli okulongoosa entambula y’emirimu ku yinivaasite y’e Makerere, okwagala eddiini ye omuli okwetaba mu kusonda ensimbi okuzimba n’okulongosa ekkanisa omuli Lutikko e Namirembe.
Mungeri y’emu agambye nti Nsibambi abadde ayagala nnyo eggwanga lye era y’emu ku nsonga lwaki asobodde okuwereza mu bifo eby’enjawulo.
Okusinzira ku ntekateeka okuva mu b’oluganda lw’omugenzi Polof Apolo Robin Nsibambi, bakuziika sabiti ajja ku Lwokubiri nga 4, omwezi ogujja Ogw’omukaaga ku ssaawa 10 ezakawungeezi e Buloba ku luguudo lwe Mityana, oluvanyuma lw’okusabira omwoyo gwe, mu Lutikko e Namirembe.
