Poliisi ekutte omusajja omu ku by’okutta omukyala Tushemereirwe Lydia myaka 35 abadde omutuuze ku kyalo Rwakabengo A cell, mu ggombolola y’e Rwakabengo mu disitulikiti y’e Rukungiri.
Omulambo gwa Tushemereirwe, gulabiddwa omu ku batuuze Bendente Margret mu ssamba ya kasooli ku kyalo kye kimu, era akubiddewo enduulu esombodde abatuuze.
Abatuuze bagamba nti omugenzi yabula akawungeezi k’olunnaku olwokutaano, okutuusa lw’azuuliddwa nga yattiddwa.
Okusinzira ku mwogezi wa Poliisi mu bitundu bye Kigezi Elly Maate, Tushemereirwe, kiteeberezebwa okuba nti yasobezeddwako oluvanyuma nattibwa kuba asangiddwa nga yayambuddwa okuva mu kiwato okudda wansi nga ne kubisambi kujjuddeko ebikuyiro.
Mungeri y’emu agambye nti amangu ddala Poliisi ekutte omusajja Nkorenta John, ayambeko Poliisi mu kunoonyereza.
Ate omulambo gutwaliddwa mu ddwaaliro e Rwakabengo okwekebejjebwa.
