Abantu 4 omuli abategesi b’ebivvulu bey Musinguzi (Abtex) ne Ssaalongo Andrew Mukasa (Bbajjo) baguddwako omusango gw’okugyemera ebiragiro.
Abtex, Bajjo ne banaabwe okuli Matovu Junior ne Kikomeko Eyekolera basimbiddwa mu maaso g’omulamuzi Doroth Bagyenyi owa Buganda Road enkya ya leero.
Oludda oluwaabi, lugamba nti ebikolwa bya Bajjo, Abtex ne banne, biraga nti bagyemedde ebiragiro by’omukulembeze w’eggwanga eby’okutangira Kolona okusasaana.
Oluvanyuma, omulamuzi akirizza okusaba kwabwe okweyimirirwa, abavunaanibwa ku mitwalo 20 buli omu ez’obuliwo ate ababeyimiridde emitwalo 50 nga si za buliwo era balagiddwa okudda mu kkooti nga 18, omwezi guno Ogwokutaano.
Bajjo, Matovu ne Eyekolera baakwattiddwa olunnaku olw’eggulo ku Lwokusatu kw’offisi ya ssaabaminisita mu Kampala nga beemulugunya engeri ensonga y’okuwa abantu emmere gyekwatiddwamu, ekiyinza okuvaako abantu okufiira mu nnyumba olw’enjala.
Ate Abtex yakwattiddwa okumpi ne Labonita era ku nsonga zezimu.
Kinnajjukirwa nti Bajjo y’omu ku batwala emmere mu National Task Force sabiti ewedde, nga yawaayo ttani z’akawunga 2, okuyambako ku bantu abali mu bwetaavu.
