Poliisi y’e Kawempe ekutte omusajja ku misango gy’obutemu oluvanyuma lwa muganzi we okufa bwe yabadde agyamu olubuto, akawungeezi k’olunnaku olw’eggulo ku Lwokusatu.
Omuwala eyafudde myaka 20, abadde muyizi ku International Paramedics Institute ku luguudo lwe Masaka era yaddukira eri muganzi we, oluvanyuma lwa Gavumenti okuggala amasomero olw’okutangira Kolona okusasaana.
Kawungeezi k’olunnaku olw’eggulo, yaddusiddwa mu Kiliniki ku kyalo kye Lugooba mu Divizoni y’e Kawempe ng’ali mu mbeera mbi kyokka omusawo yagenze okumukwatako ng’amaze okufa.
Amangu ddala omusawo yatemeza ku poliisi era omulambo gwakimiddwa ne gutwalibwa mu ddwaaliro e Mulago okwekebejjebwa.
Okusinzira kw’amyuka omwogezi wa Poliisi mu Kampala n’emirirwano Luke Owoyesigyire, Poliisi ekutte omusajja eyatutte omuwala mu ddwaaliro era mu kuwa sitetimenti, akirizza nti omuwala yabadde muganzi we kyokka yabadde agezaako okugyamu olubuto mu nkukutu.
Omusajja akwattiddwa ali ku Poliisi y’e Kawempe ku misango gy’obutemu.
Poliisi esobodde okweyambisa essimu y’omuwala okuzuula bazadde be era bategeezeddwa okukima omulambo gw’omwana waabwe.
Okusinzira ku ssemateeka wa Uganda, omuntu yenna ayambako oba okwenyigira mu kugyamu olubuto singa akwatibwako asibwa emyaka 14.
