Poliisi eyungudde basajja baayo okunoonyereza ku ngeri omusirikale eyali munnamaggye gye yafuddemu.
Omulambo gwa Rtd Corporal Mugume John Patrick gwazuuliddwa akawungeezi k’olunnaku olw’eggulo mu lutobazi ku kyalo Nyakahanga mu Monisipaali y’e Rukungiri.
Okusinzira kw’addumira mu disistulikiti y’e Rukungiri Moses Nanoka, Mugume abadde mutuuze ku kyalo Rugoma cell mu tawuni Kanso y’e Kebisoni era yabula akawungeezi k’olunnaku Olwokuna bwe yali agenda mu ddwaaliro okufuna obujanjabi.
Wabula mukyala w’omugenzi Faith Akatusasira, agamba nti bba yamusanga mu bbaala, akawungeezi k’olunnaku Olwokuna, teyagenda mu ddwaaliro era okuva ku Lwokuna abadde anoonyezebwa.
Omulambo, gutwaliddwa mu ddwaaliro erya Rwakabengo Health Centre III okwekebejjebwa, kiyambeko Poliisi okunoonyereza ku kyavuddeko okufa kwe.
