Omuyimbi Eddy Kenzo ne Sheebah Kalungi kyaddaki Omutonzi ayanukudde essaala zaabwe omuyimbi munnansi wa America Jidenna Theodore Mobisson amanyikiddwa nga Jidenna myaka 34 bw’akirizza okubawa kolabo bombi.
Jidenna abadde mu Uganda wiiki esukka mw’emu mu kivvulu kya Abryanz Style and Fashion Awards (ASFAs) ne Blankets and Wine era yazeeyo mu America ku Ssande oluvanyuma lw’okulambula ebitundu by’eggwanga ebyenjawulo.
Amawulire getufunye, galaga nti Jidenna yakirizza okuwa Kenzo ne Sheebah kolabo kyokka yalemeddwa okufuna obudde okuwandiika oluyimba n’okukwata amaloboozi (recording) ng’ali mu Uganda ne bakiriziganya okusisinkana mu America.
Mu kiseera kino, omusasi waffe ali mu kunoonya Kenzo ne Sheebah okutangaza ku nsonga eyo.
Jidenna amanyikiddwa nnyo olw’ennyimba ze omuli Classic Man, Long Live the Chief, Bambi, Sufi Woman, Little Bit More, Yoga n’endala.
Mu Uganda, Kenzo ye muyimbi asinga okumanyika mu nsi yonna ate Sheebah y’omu ku bayimbi abakyala abakoze ebintu eby’enjawulo.
