Poliisi mu Kampala ekutte omusajja abadde yefuula omukozi mu kitongole ekya Kampala Capital City Authority (KCCA) ku by’okubba pikipiki n’okufuna ssente mu lukujukuju.
Okusinzira ku mwogezi wa Poliisi mu Kampala n’emirirwano Patrick Onyango, Peter Kibirige yakwattiddwa ku Lwomukaaga nga 14, December, 2019 nga mutuuze ku kyalo Ttula, e Kawempe ku by’okubba bodaboda ekika kya Bajaj namba UEZ 837G.
Onyango agamba nti Kibirige abadde yegumbulidde, okuyimiriza bodaboda ku bitaala bya Shoprite mu Kampala okukwata bananyinizo okubagyamu ssente ng’ali mu yunifoomu eyefananyirizaako ey’ekitongole ki KCCA ng’ayita mu kubaggulako emisango emijweteke.
Ku Lwomukaaga, Kibirige aliko omusajja gwe yaggyako pikipiki ye (amannya gasirikiddwa) mbu alina emisango era ambu yali agitwala ku Poliisi era amangu ddala omusajja yaddukira ku Poliisi y’e Nakasero.
Amangu ddala poliisi yasobodde okweyambisa kkamera ku nguudo, Kibirige okukwattibwa nga yasangiddwa mu bitundu bye Nsambya-Kabalagala.
Mu kiseera kino Kibirige ali ku misango gy’okubba bodaboda n’okwefuula kyatali ku Poliisi y’e Nakesero era esssawa yonna bamutwala mu kkooti.
