Palamenti eyingidde mu nsonga z’abaana ba Ghetto Kids, okutaasa ennyumba yaabwe, abadde eganda okutundibwa essaawa yonna.
Aba Ghetto Kids baakola erinnya oluvanyuma lw’okuzinira mu vidiyo y’oluyimba Sitya Loss olwa Eddy Kenzo ssaako n’ennyimba endala.
Okuva omwezi oguwedde, aba Ghetto Kids babadde ku bunkenke oluvannyuma lw’omugagga agambibwa nti ye Mansur Ssekatawa eyabaguza ennyumba esangibwa e Makindye okubawa nsalensale wa December omwezi gunno nga bamuwaddeyo bbalansi w’ennyumba gye yabaguza oba enju okugivaamu.
Kigambibwa nti ennyumba baagigula obukadde 210 wabula ne basasulako obukadde 108 ne wasigalayo bbalansi wa bukadde 102.
Mu mbeera ey’okumatiza abantu nti babanjibwa nga betaaga okuyambibwa, maneja waabwe Dauda Kavuma ng’ayita ku mukutu gwe ogwa Face book yalaga endagaano eyakolebwa nga 15, ogwokutaano, 2019 nga bawaddeyo obukadde 18, okuweza obukadde 108 ze bakawaayo.
Wabula enkya ya leero, sipiika wa Palamenti asobodde okwanja ensonga yaabwe eri abakise ba Palamenti era bonna bakiriziganyiza okutemwako emitwalo 250,000 omwezi gunno, okutaasa enju ya baana.
Kadaga alagidde kilaka wa palamenti okuteeka mu nkola, ssente okutemwako omwezi gunno, okutaasa ennyumba y’abaana.
