Ebibiina by’obwanakyewa bitabukidde bannayuganda ku by’okulumbagana Edwin Katamba amanyikiddwa nga MC Kats olw’okulangirira nti alina akawuka akaleeta sirimu.
Okusinzira ku katambi ka vidiyo akabadde kasaasaana ku mitimbagano gya yintaneeti nga facebook, watsapp n’endala okuva sabiti ewedde, MC Kats yalangirira nti mulwadde wa sirimu ng’ali ku ddagala mu kiseera kino.
Okuva sabiti ewedde, MC Kats y’emboozi eri ku mitimbagano nga bangi ku bannayuganda, beewunyiza Kats okulangirira nti mulwadde kuba engeri gye yakikozeemu, kiyinza okukosa famire ye ssaako ne mukyala we omuyimbi Fille Mutoni.
Wabula munnamaggye eyaganyuka Maj. Rubaramira Ruranga ng’awangadde n’obulwadde emyaka egisukka 30 era nga y’omu ku batuula ku kakiiko aka Uganda AIDS Commission mu kwogerako eri bannamawulire mu Kampala, agambye nti engeri abantu gye bakuttemu ensonga za MC Kats n’engeri gye bagyogerako, kiraga nti bangi ku bannansi, bakyabulamu okusomesebwa ebikwata ku sirimu.
Agamba nti abantu nga MC Kats betaaga kubudabuda n’okubakubiriza okumira eddagala okusinga okubalumbagana.
Eddoboozi lya Maj. Rubaramira Ruranga
