Poliisi ekutte ssemaka ku by’okutta mukyala we, akawungeezi k’olunnaku olw’eggulo.
Niyonzima Gad myaka 57 nga mutuuze ku kyalo Gatwe mu ggombolola y’e Muramba mu disitulikiti y’e Kisoro, yakwattiddwa ku by’okutta kabite we Nyirabakunzi Pofia myaka 56, bwe yamukubye enkumbi ku mutwe emirundi ebiri (2).
Omukyala yafudde nga bakamutuusa mu ddwaaliro lye Mutolere ku ssaawa 9 ez’akawungeezi.
Abatuuze bekozeemu omulimu okunoonya kalibutemu ssemaka Niyonzima era yasangiddwa nga yekwese mu ssamba ya kasooli okumpi n’awaka, ne bamukwasa poliisi.
Okusinzira ku mwogezi wa Poliisi mu bitundu bye Kigezi, Elly Mate, ssemaka Niyonzima ali mu mikono gyabwe ku misango gy’obutemu era essaawa yonna bamutwala mu kkooti.
Maate era agambye nti omulambo gutwaliddwa mu ddwaaliro ekkulu e Kisoro okwekebejjebwa nga Poliisi bwenoonyereza ekyavuddeko omusajja okutta mukyala we.
