Omuyimbi Bebe Cool atabukidde muyimbi munne munna Kibiina kya NRM Ibrahim Mayanja amanyikiddwa nga Big Eye olw’okukola ebintu ebitamuyamba.
Bebe Cool awadde Big Eye amagezi okudda mu situdiyo okufulumya ennyimba ennungi okusinga okulowooza nti alina okuyimba ku bivvulu nga talina nnyimba.
Mungeri y’emu Bebe Cool agambye nti Big Eye okugamba nti abawagizi ba People Power aba Bobi Wine bamulemesezza okuyimba, abadde anoonya kumwogerako era ekirungi bamwogeddeko ku mikutu egy’enjawulo kyokka alina okuyimba ennyimba ennungi, abategesi b’ebivvulu okusobola okuddamu okumuyita ku bivvulu.
Bebe Cool era agambye nti Big Eye alina okunoonya amakkubo ag’enjawulo okuyingiza ssente omuli okutandikirawo edduuka okutunda ebintu ku kyalo, okugula ennyimba kuba bannayuganda betaaga birungi ssi kubayimbira buli kimu.
Bebe Cool okuvaayo, kiddiridde Big Eye okusaba Poliisi obukuumi, okutwala ekiwandiiko kye mu maka g’omubaka we Kyadondo East mu Palamenti Kyagulanyi Ssentamu (Bobi Wine), okumutegeeza nti abawagizi be aba People Power bamulemesezza okuyimba.
Big Eye agamba nti alina oluyimba ‘Ndi Single’ kyokka ennaku enkulu zonna ziweddeko nga tewali kivvulu kyonna kyayimbiddemu.
