Poliisi ekutte abadde yefuula omukozi mu State House ku by’okufera omuyizi ku yunivasite miriyoni emu n’emitwalo 50 (1,500,000).
Alex Wasubire myaka 45, ali ku kitebe kya Poliisi e Mbale ku by’okufera omuyizi Connie Neumbe owa Islamic University in Uganda-IUIU ng’amusuubiza okumufunira sikaala okuva mu State House.
Okusinzira ku mwogezi wa Poliisi mu bitundu bya Elgon, Robert Tukei, Wasubire, yalimbalimba abantu nti mukozi mu State House ng’anoonya abantu ab’enjawulo abetaaga okufuna sikaala mu kutambuza emisomo gyabwe.
Poliisi egamba nti Wasubire, yatuukirira muganda wa Neumbe, Kenneth Gizamba omutuuze ku kyalo Bugawola mu disitulikiti y’e Sironko, eyamuwa shs 1500,000/= okufunira muganda we sikaala, kyokka oluvanyuma kyazuuliddwa nti y’omu ku bafere.
Mu kiseera kino, Wasubire ali ku kitebe kya Poliisi e Mbale ku misango gy’okufera abantu, okwefuula kyatali era essaawa yonna, bamutwala mu kkooti.
Ate omwana Neumbe eyali awereddwa okusoma eby’eddagala, emisomo gigootaanye olwa famire, okubulwa ssente.
