Poliisi y’e Luweero ekutte abasirikale babiri (2) ku by’okulagajjalira ku mulimu gwabwe, ekivuddeko omusibe eyabadde akwattiddwa ku misango gy’okubba bodaboda, okutoloka mu kaduukulu.
Abasirikale kuliko Geoffrey Mayega ne Constable Joseph Luswata nga bakolera ku Poliisi y’e Kasana mu tawuni Kanso y’e Luweero nga bakwattiddwa ku biragiro by’addumira Poliisi y’e Luweero, Ahmed Musakana.
Omusibe Sam Kabenge, yabadde akwattiddwa ku misango gy’obubbi kyokka atolose mu kaduukulu ka Poliisi e Kasana mu kiro, ekikeseza olwa leero.
Kabenge yakwattiddwa oluvanyuma lw’okusangibwa ne bodaboda namba UE0 913A Bajaj Boxer, eyabbibwa ku Kenneth Kiramba, omutuuze we Galuweero mu tawuni y’e Luweero oluvanyuma lw’okukubwa akatayimbwa.
Kabenge nga mutuuze we Bukuuma mu tawuni y’e Luweero, yakwattibwa nga 31, December, 2019 era abadde akulungudde annaku 8 mu kaduukulu ka Poliisi e Kasana okutuusa lw’atolose mu kiro, ekikeseza olwa leero.
Wabula DPC Musakana agamba nti abasirikale bakwattiddwa okutuusa nga banyonyodde omusibe gy’addukidde kuba kiteeberezebwa mulimu okwekobaana, okutolosa omusibe.
Wabula omu ku basirikale agaanye okwatuukiriza amaanya ge, agambye nti omusibe Kabenge yatolose, omusirikale Luswata bwe yabadde aguddewo akaduukulu okuteekayo omusibe omulala.
Yadduse omulundi gumu kyokka balemeddwa okumukwata olw’enzikiza esukkiridde.
