Entiisa n’ekiyongobero bibuutikidde ku kyalo Bugongi mu Monisipaali y’e Kabale, omusajja Twinembabazi John Bosco ali mu gy’obukulu 40 bw’asangiddwa nga yetugidde mu nnyumba.
John Bosco musajja abadde avuga bodaboda ku siteegi ya Highland mu kitundu ekyo era okwetta, yasobodde okweyambisa amasuuka, omulambo gusangiddwa nga gulengejja mu kazigo mwabadde asula.
Abatuuze nga begatiddwako Poliisi ne Landiloodi baludde nga bebuuza, John Bosco gy’ali kyokka bageenze okumenya oluggi, amaaso gatuukidde ku mulambo.
Abamu ku batuuze abagaanye okwatuukiriza amaanya gaabwe, bagamba nti omugenzi abadde alina mukyala gw’ayagala ali mu gy’obukulu 25 kyokka sabiiti ewedde, yamukutte n’omusajja omulala nga bali kusinda mukwano nga kiteeberezebwa eyinza okuba emu ku nsonga lwaki yesse.
Elly Maate, omwogezi wa Poliisi mu bitundu bye Kigezi agambye nti Poliisi etandiise okunoonyereza okuzuula ekyavuddeko John Bosco okwetta.
