Kkooti ya Buganda Road wansi w’omulamuzi Asuman Muhumuza eyimbudde bannakatemba ‘Bizonto‘ ebikwatiddwa enkya ya leero.
Bizonto omuli Sserwanja Julius, Mbabali Maliseeri, Ssabakaki Peter ne Gold Ki-Matono, basimbiddwa mu kkooti akawungeezi ka leero era baguddwako emisango gy’okweyambisa ebigambo ebigendereddwamu okusiiga obukyayi n’okwawulamu bannayuganda.
Okusinzira ku ludda oluwaabi nga lukulembeddwamu Patricia Chingtho, Bizonto ne banaabwe, abakyaliira ku nsiko mu Gwomukaaga 2020, baakwata vidiyo nga mwalimu ebigambo ebigendereddwamu okusiiga obukyayi ne katambuzibwa ku mikutu migatta bantu.
Bizonto nga bikulembeddwamu munnamateeka waabwe Lutalo Derrick begaanye omusango era amangu ddala basabye omulamuzi okukkirizibwa okweyimirirwa.
Omulamuzi akkiriza okusaba kwabwe era bayimbuddwa ku ssente emitwalo 10 buli omu ez’obuliwo ate ababeyimiridde ssente emitwalo 50 nga Bizonto balina okudda mu kkooti 8 omwezi ogujja Ogwokuna.
Sserwanja.
Sserwanja musajja muganda alina emyaka 35, munnamawulire nga mutuuze ku kyalo Namuzi mu Tawuni Kanso y’e Kajjansi mu disitulikiti y’e Wakiso.
Mbabali.
Mbabali naye musajja Muganda alina emyaka 36, munnamawulire nga mutuuze we Kyebando mu zzooni ya Katale mu Divizoni y’e Kawempe mu Kampala.
Ki-Matono.
Ki-Matono myaka 49 musajja Muganda, munnamawulire, mutuuze we Senge mu ggoombolola y’e Wakiso mu disitulikiti y’e Wakiso.
Ssebakaki.
Ssebakaki naye musajja Muganda alina emyaka 35, munnamawulire nga mutuuze we Old Kira- Bukoto mu Divizoni y’e Nakawa mu disitulikiti ya Kampala.
Omwogezi w’ekitongole kya poliisi ekinoonyereza ku buzzi bw’emisango ekya Criminal Investigations Directorate (CID) Charles Twine agamba nti Bizonto okulemwa okweyanjula ku Poliisi oluvanyuma lw’okuyimbulwa omwaka oguwedde ogwa 2020, y’emu ku nzonga lwaki bazzeemu okubakwata enkya ya leero.
Twine agamba nti omuwaabi wa Gavumenti oluvanyuma lw’okunoonyereza ku musango gw’okweyambisa ebigambo ebiyinza okwawulamu eggwanga, amangu ddala yalagidde ekitongole kya Poliisi okuddamu okukwata Bizonto bitwalibwe mu kkooti ya Buganda Road, ekintu ekikoleddwa enkya ya leero.
Mungeri y’emu agambye nti wadde mu Uganda bimanyiddwa nga Bizonto, naye alipoota y’abasawo okuva mu ddwaaliro e Butabika eraga nti emitwe gyabwe gikola bulungi nnyo era y’emu ku nsonga lwaki balina okuwerenemba n’omusango mu kkooti.
